Pader ng Bayan

Kailangan bang makatanggap tayo ng masakit na salita bago tayo matuto? Bakit nga ba ganon na lang tayong mga tao. Hindi naman lahat ang aking tinutukoy. Mahirap bang pumunta sa comfort room para umihi? Ang alam ko nga aso lang gumagawa nito. Tanggap na ba ng ibang mga Pilipino na nag-aasal hayop na tayo minsan? Mula sa mga krimen, pag-uugali, kawalan ng respeto at MARAMI pang iba.

Sa pagkakaalam ko, hindi naman laganap ang ganitong uri ng gawain sa ibang bansa. Saan ba nagsimula ang lahat ng ito? Naging idol ba ng mga tao ang mga aso kaya walang patumpik tumpik kapag naabutan, sa pader ang bagsak? Sabi nga sa isang commercial, kung nakakapagsalita lang pader baka namura na ang mga taong gumagawa nito.

Hindi naman nating pwedeng idahilan na ang mga taong gumagwa nito ay mga walang pinag-aralan. Bakit? Kasi nung mga bata pa lang tayo tinuruan na tayo ng mga magulang natin na “anak, kapag naihi o nadumi ka punta ka lang sa banyo”. Minsan pa nga napapagalitan tayo. “Ang laki laki mo na, naabutan ka pa din!”. Siguro nga nadala na ng iba ganitong pag-uugali. Ayon sa sikolohiya, kapag lalo mo daw pinipigil ang isang tao sa paggawa ng mga bagay-bagay, ay lalo siyang magpupursiging gawin ito. Hanep! Sana pigilan na lang ang lahat ng tao mag-aral para lahat magsikap. Mahirap unawain ang mga ganitong bagay. Pero natitiyak ko na isa ang PINAKA dahilan ng ganitong phenomena. Ang pagiging TAMAD.

Mula’t sapul ito ang dahilan. Andiyan na nga naman ang mga pader at iba pang lugar na wala namang nakabantay sa mga ito. Konting tingin tingin lang diyan at kapag walang nakatingin, ayan na, ilalabas na ang sandata at ready for firing na. Mabilis lang di ba? Hindi nga naman nasayang ang oras mo na hahanap ka pa ng C.R (comfortable nga ba) para lang umihi. Wais! Nagawa pa natin ang time management. Iba ang pinoy. Gagawa at gagawa ng paraan para mapadali ang isang bagay. Dun naman ako humahanga. Wala lang naman yung nagawa mo eh. Bumaho lang naman yung pader na pinagawa ng may-ari na baka ang perang pinanggalingan nito ay mula sa pawis at dugo na buong buhay niya pinag-ipunan tapos inihian mo lang naman. Wala lang di ba? Walang wala. Hindi nakakahiya sayo.

Sana lang maging laganap ang pagiging logical ng isang tao. Hindi naman kailangan lahat ipapamuka na sa atin. Hindi lahat visually stated na kailangan pang alalahanan ang isang tao bago niya gawin ang tama. Sana mangibabaw ang pagiging TAO nating mga Pinoy. Hindi nawa tayo makalimot sa totoong pinagmulan natin. Kung lahat lang tayo ay gagamit ng common sense na tinatawag, maayos na pamumuhay siguro matatamasa natin. Malay niyo, hindi gobyerno ang simula, kayo, tayo.

BAWAL UMIHI DITO! Siguro ito ang pinakasikat na tagline sa Pilipinas. It’s more fun in the Philippines eh. Laging tandaan : kapag ang pader gumanti, mata lang ang walang latay.

--Suelan Jr.