EDSA ng Bayan

                                                       (Imahe mula sa HabagatCentral.com/ http://habagatcentral.com/tag/edsa-bus/)

Ipinangalan kay Epifanio Delos Santos, isang magaling na mamamahayag, pilosopo, abogado, pintor at iba pa. Ang EDSA ay sikat noon bilang Highway 54.

Ang kalyeng nagdurugtong sa halos lahat ng lungsod sa kalakhang Maynila. Ang kalyeng dinadaanan ng halos dalawang milyong sasakyan araw araw. Ang kalyeng sumikat noong dekada otienta para mapatalsik ang diktadorya. At ang kalyeng inuulan ng mura araw araw.

Sa umaga, sa oras ng pagpasok, isa sa mga naiisip natin ay kung trapik ba sa EDSA. Madalas ding laman ng balita lalo na sa mga oras na alas otso ng umaga at alas sais ng gabi. Animo’y isang malaking parking lot o isang malaking auto show sa dami ng sasakyan. Kaya madalas ang anggulo ng aksidente, mapa maliit or malaki. Nariyan ang mga banggaang sanhi ng hindi pagbibigayan, banggaang sanhi ng maling pag hilera sa mga lanes ng kalye at mga aksidenteng malala at kumikitil ng buhay kagaya ng nangyari sa EDSA-Ortigas flyover.

Kaya naman madalas uminit ang ulo ng mga taong dumadaan dito, lalo na kung sinasabing “newbie” ka palang pag dating sa pagmamaneho sa EDSA. Bukod sa nanakit ang binti, hita at paa mo sa kaka palit ng apak sa preno at accelerator (clutch pa kung manual), e mananakit din ang ulo mo sa tagal ng byahe.

At dapat masanay ka na kung hindi lang ngitngit ng malalakas na busina ang maririnig mo, pati na rin ang nagbabagang maaanghang na salita. Sa tuwing maiipit ka sa trapik ng EDSA sa oras ng pagmamadali mo, si EDSA ang sisisihin mo, madalas ang katagang “(Mura) EDSA yan, trapik na naman!” Sa oras na malalate ka sa trabaho, o sa date mo o sa family occasion nyo at naipit ka sa trapik ng EDSA, sasabihin “Sorry late, trapik sa EDSA e.”

Kung nabubuhay siguro sa Epifanio Delos Santos, siguro’y masama na rin ang loob nya sa mga taong sya ang halos sinisisi dahil sa trapik sa EDSA. Itutok mo ang mga bus terminals sa tabi ng EDSA, hindi bat malaking sagabal kung magsisimula na ang byahe ng mga mahahabang bus na ito, bukod pa yan sa mga bus na panglungsod ang ruta. Maliban pa dito ay ang mga drayber na mga abusado, madalas kahit masakit mang sabihin, ay ang ating mga kababayan na ang mga drayber ng bus na basta basta nalang bumabalandra sa mga lanes ng EDSA, magbababa at magsasakay sa mga hindi tamang lugar. Pero kahit sila ang nagkamali, si EDSA pa din ang bukang bibig na sisihin natin.

Maging ang mga taxi, dyip, ay kasama sa mga nagpapasikip sa EDSA. Babalandra sa gilid at magaabang ng pasahero, na kung sana’y nadadaanan nalang ay maiibsan ng kahit katiting ang trapik. Maging ang pribadong sasakyan ay may mga walang disiplinang tao din, binabagalan ang kanilang pagmamaneho dahil kung hindi nagtetext ay may kausap sa telepono. Oo nga’t maingat ka pero mali pa ring may kausap ka sa telepono habang nagmamaneho ka sa kahabaan ng EDSA. Pero sa kabila ng mga kasalanang di nila nakikita, si EDSA pa rin ang bukang bibig nila.

Kung titignan naman kasi ay urban development plan lang ang kulang sa Maynila. Kung sana’y makakagagawa tayo ng isa o dalawa pang lungsod na maihahalintulad sa Maynila ay di kailangan makipagsiksikan at makipagsapalaran dito. Ayon sa balita, mungkahi ni MMDA Chairman Francis Tolentino, na irelocate ang Manila, ang tingin ng nakararami ay tama. Mababawasan ang dami ng sasakyan sa Maynila, dadami nag opurtunidad sa ibang lugar at hindi na kailangang makipagsapalaran sa Maynila, bagkus ay sa bagong lugar na idinedevelop, kagaya ng Laguna, na inuumpisahan ng tayuan nang mga establisimiento at ang kagandahan nito’y sa labas ito ng Maynila.

Ngunit, aabutin pa siguro tayo ng ilang taon para magawa ang planong ito. Habang nasa pagpaplano pa siguro ang gobyerno, siguro dapat ibalik nalang sa highway 54 ulit ang EDSA. Bukod sa ito naman ang unang pangalan nito, hindi natin nasisira ang pangalan ni Epipanio Delos Santos.

May mga nagsusuwestyon din na gawin nalang Corazon Aquino Avenue ang EDSA, pero sa tingin ko ay hindi na kailangan at hinding hindi ito gagawin ng anak nyang ni Kagalang galang na Pangulong Benigno Aquino III. Ikaw ba na pangulo, papayag ka kaya na murahin ng mga motorista ang nanay mo? Papayag ka kayang sabihang “(Mura) Cory yan, trapik na naman?” Hindi naman diba?

----M.D. Salayo